Korrupsiyaya qarşı mübarizənin gücləndirilməsinə həsr olunmuş xüsusi dərslər təşkil olunub

22 fevral 2024-cü il tarixində Elm və Təhsil Nazirliyinin müvafiq əmri ilə "Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı"nın icrası ilə bağlı Azərbaycan Respublikası Elm və Təhsil Nazirliyinin 2024-cü il üzrə İş Planı" na uyğyn olaraq UNEC nəzdində Sosial İqtisadi Kollecdə xüsusi dərslər təşkil olunub.

Milli Fəaliyyət Planının 2.4.bəndinin icrasına həsr olunmuş xüsusi dərslərdə UNEC nəzdində Sosial İqtisadi Kollecin “Kargüzarlıq və sosial iş” FBK-nın müəllimi Səyyad Əhmədov tələbələrin nəzərinə catdırdı ki, bu sahədə aparılan islahatlar ölkəmizin bütün sahələrində əsaslı dönüş yaradıb və korrupsiyaya eləcə də rüşvətxorluğa qarşı aparılan mübarizə islahatların bir növ məntiqi davamıdır. Korrupsiya və rüşvətxorluq ümumbəşəri bəladır və dünyada daim buna qarşı ciddi mübarizə aparılsa da, hələ də kökü kəsilmir. Azərbaycan isə artıq bu mübarizədə nümunəvi dövlətə çevrilir. Kimliyindən asılı olmayaraq, dövlət məmurlarına güzəşt olunmaması, korrupsiya və rüşvətə aludə olmuş vəzifəli şəxslərə qarşı sərt tədbirlərin görülməsi xüsusi vurğulanmalıdır.

Dövlət başçısının korrupsiya və rüşvətxorluqla mübarizənin getdikcə sərtləşdirməsi və vətəndaş-məmur münasibətlərinin daha sağlam prinsiplər üzərində qurulmasına verdiyi önəm hər bir ölkə vətəndaşının ürəyincədir.